zurückEinzelansichtvor

Hiob - Kapitel 12

¹ DA antwortet Hiob / vnd sprach / ² Ja jr seid die Leute / mit euch wird die weisheit sterben. ³ Jch hab so wol ein hertz als jr / vnd bin nicht geringer denn jr / Vnd wer ist / der solchs nicht wisse? ⁴ Wer von seinem Nehesten verlachet wird / der wird Gott anruffen / der wird jn erhören / Der gerechte vnd frome mus verlachet sein. ⁵ Vnd ist ein verachtet LiechtlinJd est / Glommend tocht. fur den gedancken der Stoltzen / stehet aber das sie sich dran ergern. ⁶ Der Verstörer hütten haben die fülle / vnd toben wider Gott thürstiglich / wiewol es jnen Gott in jre hende gegeben hat. ⁷ FRage doch das Vieh / das wird dichs leren / vnd die Vogel vnter dem Himel / die werden dirs sagen. ⁸ Oder rede mit der Erden / die wird dichs leren / vnd die fisch im meer werden dirs erzelen. ⁹ Wer weis solchs alles nicht / das des HERRN Hand das gemacht hat? ¹⁰ Das in seiner Hand ist die Seele alles des da lebet / vnd der Geist alles fleischs eins jglichen? _{(4. Mose 16.22)} ¹¹ Prüfet nicht das ohre die rede? vnd der mund schmeckt die speise? ¹² Ja bey den Grosuetern ist die weisheitDas ist / Jr saget weisheit sey bey den Grosuetern. Jch sage aber sie sey bey Gott / welcher allein aller Könige / Priester / Richter / gewalt / kunst / heiligkeit zu nicht macht. / vnd der verstand bey den Alten. _{(Hiob 8.8)} ¹³ Bey jm ist weisheit vnd gewalt / rat vnd verstand. ¹⁴ Sihe / wenn er zubricht / so hilfft kein bawen. Wenn er jemand verschleusst / kan niemand auffmachen. ¹⁵ Sihe / wenn er das wasser verschleusst / So wirds alles dürre / Vnd wenn ers auslesset / So keret es das Land vmb. _{(1. Mose 7.19-23) (1. Könige 17.1) (1. Könige 17.7)} ¹⁶ Er ist starck vnd fürets aus / Sein ist der da jrret / vnd der da verfüret. ¹⁷ ER füret die Klugen wie ein raub / vnd macht die Richter toll. ¹⁸ Er löset auff der Könige zwang / Vnd gürtet mit einem gürtel jre Lenden. ¹⁹ Er füret die Priester wie ein raub / Vnd lessts feilen den Fessten. ²⁰ Er wendet weg die lippen der Warhafftigen / vnd nimpt weg die sitten der Alten. ²¹ Er schüttet verachtung auff die Fürsten / vnd macht den bund der Gewaltigen los. ²² Er öffenet die finstern gründe / vnd bringt er aus das tunckel an das liecht. ²³ Er macht etlich zum grossen Volck / vnd bringet sie wider vmb. Er breitet ein Volck aus / vnd treibts wider weg. ²⁴ Er nimpt weg den mut der Obersten des Volcks im Lande / vnd macht sie jrre auff eim vnwege / da kein weg ist. ²⁵ Das sie die finsternis tappen on liecht / vnd macht sie jrre / wie die Trunckene. _{(Hiob 5.14)}

zurückEinzelansichtvor

Hiob - Kapitel 9

¹ HJob antwortet / vnd sprach / ² Ja ich weis fast wol / das also ist / das ein Mensch nicht rechtfertig bestehen mag gegen Gott. _{(Hiob 25.4)} ³ Hat er lust mit jm zu haddern / so kan er jm auff tausent nicht eins antworten. _{(Psalm 19.13)} ⁴ Er ist weise vnd mechtig / Wem ists je gelungen / der sich wider jn gelegt hat? ⁵ Er versetzt Berge / ehe sie es innen werden / die er in seinem zorn vmbkeret. ⁶ Er weget ein Land aus seinem ort / das seine pfeiler zittern. ⁷ Er spricht zur Sonnen / so gehet sie nicht auff / vnd versiegelt die Sterne. ⁸ Er breitet den Himel aus allein / vnd gehet auff den wogen des Meers. _{(Jesaja 40.22)} ⁹ Er machet den Wagen am himel vnd OrionJst das helle Gestirne gegen mittag / das die Bauern den Jacobsstab heissen. Die Glucken oder die Henne / sind die sieben kleine Gestirne. vnd die Glucken vnd die Stern gegen mittag. _{(Hiob 38.31) (Jesaja 13.10) (Amos 5.8)} ¹⁰ Er thut grosse ding die nicht zu forschen sind / vnd Wunder der keine zal ist. Amos 5. _{(Hiob 5.9)} ¹¹ SJhe / er gehet fur mir vber / ehe ichs gewar werde / vnd verwandelt sich ehe ichs mercke. ¹² Sihe / wenn er schwind hinferet / wer wil jn wider holen? Wer wil zu jm sagen / was machstu? ¹³ Er ist Gott / seinen Zorn kan niemand stillen / vnter jm müssen sich beugen die stoltzen HerrnDie stoltzen Junckherrn / die sich auff jre macht verlassen / vnd jederman helffen können. . _{(Hiob 26.12)} ¹⁴ Wie solt ich denn jm antworten / vnd wort finden gegen jm? ¹⁵ Wenn ich auch gleich recht habe / kan ich jm dennoch nicht antworten / sondern ich müst vmb mein Recht flehen. ¹⁶ Wenn ich jn schon anruffe / vnd er mich erhöret / So gleube ich doch nicht / das er meine stimme höre. ¹⁷ Denn er feret vber mich mit vngestüme / vnd macht mir der Wunden viel on vrsach. ¹⁸ Er lesst meinen Geist sich nicht erquicken / Sondern macht mich vol betrübnis. ¹⁹ Wil man macht / so ist er zu mechtig / Wil man Recht / wer wil mein Zeuge sein? _{(Hiob 9.33)} ²⁰ Sage ich / das ich gerecht bin / So verdammet er mich doch / Bin ich from / So macht er mich doch zu vnrecht. ²¹ 21Bin ich denn From / So that sichs meine seele nicht annemen / Jch begere keines Lebens mehr. ²² Das ist das eine / das ich gesagt habe / Er bringt vmb beide den Fromen vnd Gottlosen. _{(Hiob 8.20) (Prediger 9.2-3)} ²³ Wenn er anhebt zu geisseln / So dringet er fort bald zum Tod / vnd spottet der anfechtung der Vnschüldigen. ²⁴ Das Land aber wird gegeben vnter die hand des Gottlosen / Das er jre Richter vnterdrücke / Jsts nicht also / wie solts anders sein? ²⁵ MEine tage sind schneller gewesen denn ein Lauffer / sie sind geflohen vnd haben nichts guts erlebt. ²⁶ Sie sind vergangen / wie die starcken Schiff / wie ein Adeler fleugt zur speise. ²⁷ Wenn ich gedenck ich wil meiner Klage vergessen / vnd mein geberde lassen faren / vnd mich erquicken. ²⁸ So furchte ich alle meine schmertzenScilicet, ne redeant. / weil ich weis / das du mich nicht vnschüldig sein lessest. ²⁹ Bin ich denn Gottlos / warumb leide ich denn solche vergebliche plage? ³⁰ Wenn ich mich gleich mit Schneewasser wüssche / vnd reinigete meine Hende mit dem brunnen. ³¹ So wirstu mich doch tuncken in Kot / vnd werden mir meine KleiderDas ist / meine Tugent.scheuslich anstehen. ³² Denn er ist nicht mein Gleiche / dem ich antworten möchte / das wir fur Gerichte mit einander kemen. ³³ Es ist vnter vns kein Scheideman / noch der seine hand zwisschen vns beide lege. ³⁴ Er neme von mir seine Ruten / vnd las sein schrecken von mir. ³⁵ Das ich müge reden / vnd mich nicht fur jm fürchten dürffe / Sonst kan ich nichts thun / das fur mich sey.